Ronaldo dreymir um að mæta Man. Utd í Meistaradeildinni

Cristiano Ronaldo, leikmaður Real Madrid, dreymir um að mæta sínu gamla félagi, Man. Utd, í úrslitaleik Meistaradeildar Evrópu.

Real mætir Barcelona í undanúrslitum keppninnar á meðan Man. Utd mætir Schalke. Það eru því nokkrar líkur á því að draumur Ronaldo rætist.

"Auðvitað vil ég mæta Man. Utd í úrslitum. Ég á enn marga vini þar og góðar minningar. Ég átti frábær sex ár hjá félaginu. Fyrst þurfum við samt að spila gegn Barcelona og svo sjáum við hvað gerist," sagði Ronaldo.

Spænsku liðin munu mætast fjórum sinnum á næstu vikum og Ronaldo segir erfitt að hugsa um nokkuð annað.

"Ég vil ekki tala um að við þurfum að hefna gegn Barcelona en þetta er risaleikur fyrir alla. Í dag eru þetta tvö bestu lið heims. Allur heimurinn mun standa upp og fylgjast með. Við höfum trú á því að við getum klárað Barcelona í Meistaradeildinni. Núna þurfum við að hugsa um Barca. Ég get hugsað um Man. Utd síðar."