Xabi Alonso: Ekki einu sinni nálægt því að vera búið

Xabi Alonso var ekki tilbúinn að afskrifa Tottenham þrátt fyrir 4-0 sigur Real Madrid á enska liðinu í fyrri leik liðanna í átta liða úrslitum Meistaradeildarinnar í kvöld. Xabi var í liði Liverpool sem vann Meistaradeildin 2005 eftir að hafa lent 3-0 undir í úrslitaleiknum.

„Þetta er ekki einu sinni nálægt því að vera búið. Við höfum séð nokkrar ótrúlegar endurkomur og við verðum að mæta tilbúnir á White Hart Lane," sagði Xabi Alonso, leikmaður Real Madrid og fyrrum leikmaður Liverpool.

„Þeir munu sækja á okkur frá fyrstu mínútu og við verðum að passa okkur. Við þurftum að vera þolinmóðir í kvöld en um leið og við náðum öðru markinu þá brotnuðu þeir. Það var því auðveldara að ná þriðja og fjórða markinu," sagði Xabi.