Pato slær sér upp með dóttur Berlusconi

Brasilíumaðurinn Pato vinnur að því hörðum höndum að tryggja sér öruggt sæti í byrjunarliði AC Milan. Það skemmir eflaust ekkert fyrir möguleikum hans að hann sé kominn á fast með dóttur Silvio Berlusconi, eiganda félagsins.

Á miðvikudag voru birtar fyrstu myndirnar af nýja parinu en þá voru þau að kyssast. Eftir það hafa ítalskir fjölmiðlar elt parið á röndum.

Dóttir Berlusconi heitir Barbara og er 27 ára gömul. Sjálfur er Pato aðeins 21 árs.

Þrátt fyrir ungan aldur á Pato eitt misheppnað hjónaband að baki. Hann skildi við brasilíska eiginkonu sína fyrir ári síðan.