Dómari ákvað með klukkutíma fyrirvara að dæma Gunnar Rúnar í dag

Fjölskylda og aðstandendur Hannesar Þórs Helgasonar sem myrtur var á síðasta ári gagnrýna harðlega í yfirlýsingu að hafa ekki fengið að vita það með nokkrum fyrirvara að til stæði að dæma morðingja Hannesar í morgun. Í svari frá dómstólnum til Vísis segir að ákvörðunin um að fella dóminn í dag hafi ekki verið tekin fyrr en í morgun og boð þess efnis vor send út með rúmlega klukkutíma fyrirvara.

Í yfirlýsingunni frá aðstandendunum segir að það sé „algjör vanvirðing við fjölskyldu og aðstandendur Hannesar hvernig staðið var að tilkynningarskyldu varðandi dómsuppkvaðningu nú í morgun. Þar sem dómari sendir eingöngu verjanda okkar tölvupóst klukkan 8:49 í morgun þess efnis að dómsuppkvaðning sé klukkan 10," segir í yfirlýsingunni og því bætt við að klukkutíma fyrirvari sé með öllu óásættanlegar.

„Þar að auki brást tilkynningarskyldan algerlega gagnvart aðstandendum og fjölmiðlum þar sem hvergi var birt í dagskrá Héraðsdóms að dómskvaðning í málinu færi fram í dag. Ofan á það má bæta að samkvæmt öruggum heimildum okkar höfðu bæði verjandi og ríkissaksóknari vitneskju um dómsuppkvaðningu þessa fyrir nokkrum dögum síðan. Það er algjört hneyksli og vanvirðing gagnvart fjölskyldu Hannesar heitins að dómsuppkvaðningin skuli fara fram eins og hluti af lokuðum réttarhöldum þrátt fyrir að þessi hafi verið úrskurðuð opin," segir fjölskyldan og bætir við: „Það er greinilegt að dómstólar Íslands í dag vilja sópa öllu undir borðið og láta sem fæsta fylgjast með því hvað fer fram í þessu ónýta dómskerfi sem við búum við."

Lá fyrir að fjölskyldan gæti ekki verið viðstödd

Vísir sendi Héraðsdómi Reykjaness fyrirspurn um málið. Í svari frá dómritara segir að dómari hafi ákveðið fyrst í morgun að dómur yrði kveðinn upp klukkan 10:00 og að öllum hlutaðeigandi hafi verið sendur tölvupóstur um það klukkan 8:45.

Í svarinu segir líka að lögmaður bótakrefjanda, Helga og Jónu, hafi fyrir nokkru síðan tilkynnt dómara að aðstandendur Hannesar færu til útlanda 26. febrúar sl. og þannig lá fyrir að þeir gætu ekki verið viðstaddir dómsuppkvaðninguna.

„Vegna fullyrðinga um að skv. „öruggum heimildum" hafi verjandi og sækjandi haft vitneskju um að dómur yrði kveðinn upp á umræddum tíma þá skal tekið fram að það er ekki rétt þar sem tími dómsuppkvaðningar var ákveðinn í morgun og boðun send í beinu framhaldi," segir að lokum.