Gullverðið komið í sögulegt hámark

Heimsmarkaðsverð á gulli í framvirkum samningum fram í apríl fór í rúma 1.431 dollar á únsuna undir lok markaða í gærdag. Hefur verðið aldrei verið hærra í sögunni. Gullið hækkaði um 21,30 dollara yfir daginn í gær.

Á sama tíma fór verð á silfri upp í 34,4 dollara á únsuna og hafði ekki verið hærra síðan árið 1980.

Það er ástandið í Arabalöndum sem gerir það að verkum að verð á gulli og silfri hækkar svona mikið þessa daganna. Fjárfestar hafa löngum litið á gull sem „örugga höfn“ fyrir fé sitt þegar eitthvað bjátar á í heiminum. Silfur er í auknum mæli að ná þessari stöðu einnig enda fer megnið af silfurframleiðslu heimsins til ýmissa nota hjá iðnaðarfyrirtækjum.

Fyrir utan Líbýu fylgjast fjárfestar nú grannt með þróun mála í Saudi Arabíu stærsta olíuframleiðenda heimsins. Þar hefur verið boðað til mótmæla í næstu viku og bara orðrómurinn um mótmælin leiddi til þess að hlutabréfamarkaðurinn í Saudi Arabíu hrundi í gærdag.