Dortmund enn á sigurbraut

Michael Rensing átti stórleik í marki Köln í kvöld en náði þó ekki að koma í veg fyrir enn einn sigur Dortmund í þýsku úrvalsdeildinni.

Robert Lewandowski kom Dortmund yfir á 44. mínútu en það var aðeins Rensing að þakka að mörkin urðu ekki fleiri. Hann sýndi oft tilþrif á heimsmælikvarða í leiknum.

Dortmund er nú með fimmtán stiga forystu á Leverkusen á toppi deildarinnar en leikurinn í kvöld var sá fyrsti í 25. umferð deildarinnar.

Dortmund hefur verið á mikilli siglingu í vetur og hefur ekki tapað leik í deildinni síðan um miðjan desember.

Köln er í ellefta sæti deildarinnar með 29 stig.