Iceland Foods í útrás til Austur Evrópu

Malcolm Walker forstjóri Iceland Foods verslunarkeðjunnar á nú í samningaviðræðum við samstarfsaðila í Austur Evrópu. Walker hyggst koma á fót Iceland verslunum í Póllandi, Tékklandi og Ungverjalandi.

Þetta kemur fram í viðtali Daily Mail við forstjórann. Það eru yfir 20 ár síðan Iceland starfaði síðast utan Bretlands en það var í Frakklandi. Síðustu Iceland verslunum í Frakklandi var lokað í kringum 1989.

„Það finnast varla verslanir með frosnar matvörur í Austur Evrópu,“ segir Walker. „Fólk þarna er að breyta um lífsstíl og því gætu verið mikil tækifæri til staðar.“

Fram kemur í viðtalinu að Walker hefur áform um að bæta 300 verslunum við þær 750 sem þegar eru reknar á vegum Iceland. Þá segir einnig í Daily Mail að reiknað sé með að hagnaður Iceland á síðasta ári hafi numið yfir 200 milljónum punda. Í Financial Times segir að hagnaðurinn muni nema 190 milljónum punda.