Ancelotti tekur ekki við Ítalíu í sumar

Carlo Ancelotti, knattspyrnustjóri Chelsea, segir ekkert til í þeim sögusögnum að hann muni taka við landsliði Ítalíu eftir heimsmeistaramótið í sumar.

„Mér líður vel hér. Liðið á góða möguleika að vinna titla," sagði Ancelotti sem segist þó vonast til að ítalskur þjálfari muni taka við landsliðinu eftir Marcello Lippi.

Ancelotti segir jafnframt að enska landsliðið sé betra en það ítalska sem stendur. „England á góða möguleika, er með hörkulið og væntingarnar eru miklar. Ítalía er í annarri stöðu en liðið er að ganga í gegnum ákveðið breytingaskeið," sagði Ancelotti.