Almeida ákvað að fara til Tyrklands

Portúgalski framherjinn Hugo Almeida hefur ákveðið að skipta um félag þessi jólin því tyrkneska liðið Besiktas er búið að kaupa hann frá þýska liðinu Werder Bremen. Kaupverðið er 2 milljónir evra.

Þessi 26 ára gamli framherji hefur verið í fínu formi fyrir Bremen í vetur og hefur þegar skorað 9 mörk í 13 leikjum í vetur.

Fjölmörg lið hafa sýnt honum áhuga síðustu misseri og má þar nefna lið eins og Real Madrid og Lazio.

Þess vegna vekur nokkra athygli að hann hafi valið að fara til Tyrklands.