Ronaldinho líklega á förum frá Milan

Ítalskir fjölmiðlar segja afar litlar líkur á því að Brasilíumaðurinn Ronaldinho verði áfram í herbúðum AC Milan á næsta ári.

AC Milan þarf að skera hraustlega niður í rekstrinum sökum bágrar fjárhagsstöðu og ofurlaunasamningur eins og Ronaldinho er eitthvað sem félagið ræður ekki við.

Ronaldinho fær 8 milljónir evra í árslaun í dag en samkvæmt nýju launaþaki félagsins fær enginn leikmaður yfir 4 milljónir í árslaun. Talið er að Ronaldinho muni aldrei samþykkja slíka lækkun.

Umboðsmaður hans er nú kominn til Mílanó í von um að ná lendingu í málinu. Náist hún ekki verður Ronaldinho settur á sölulista.