Red Bull, Vettel og Webber sættast

Red Bull liðið sendi frá sér tilkynningu í dag þar sem segir að sátt sé á milli Mark Webber og Sebastian Vettel og atvikið í tyrkneska kappakstrinum sé nú að baki.

Christian Horner, framkvæmdarstjóri Red Bull, Adrian Newey, hönnuður og Helmut Marko, sem er ráðgjafi hjá liðinu hittu Mark Webber og Sebastian Vettel í dag í bækistöð liðsins. Rætt var um áreksturinn á milli Webber og Vettels sem kostaði liðið mögulegan sigur í mótinu. Þeir vo´ru í fyrsta og öðru sæti þegar þeir skullu saman, er Vettel reyndi framúrakstur.

"Þetta var jákvæður fundur sem bindur endi á málið sem varð í 4o hring í tyrkneska mótinu. Liðið setur núna fókusinn á kanadíska kappaksturinn í næstu viku", sagði í tilkynningu liðsins í frétt á autosport.com.

"Liðið kom okkur í góða stöðu og það sem gerðist var ekki gott fyrir liðið. Mér þykir leitt þeirra vegna að við misstum af forystuhlutverkinu", sagði Vettel.

"Við Mark erum kappakstursmenn og vorum að keppa. Við erum fagmenn og atvikið mun ekki breyta því hvernig við vinnum saman. Við erum í frábæru liði og liðsandinn er öflugur. Ég hlakka til Kanada."

Mark samsinni Vettel í tilkynningunni.

"Þetta var leitt fyrir liðið þar sem við töpuðum af góðu tækifæri til að vinna. Þetta er íþrótt og svona hlutir gerast, en hefði ekki átt að gerast. Ég finn til með öllum hjá Red Bull og öllum sem koma að málinu. Við Seb munum gæta þess að þetta gerist ekki aftur. Það er búið að tala nóg um þetta, málið er úr sögunni.

Núna einblíni ég á mótið í Kanada", sagði Webber.