Rændi 10-11 með hulið andlit

Lögreglan á höfuð­borgar­svæðinu leitaði í gær manns sem rændi 10-11 verslun á Melabraut í Hafnarfirði í gærmorgun.

Það var rétt fyrir klukkan átta í gærmorgun sem maður kom inn í verslunina. Hann var með klút fyrir andlitinu og krafðist þess að fá peninga og sígarettur. Hann hafði uppi hótanir um að beita vopni yrði afgreiðslumaðurinn ekki við kröfum sínum.

Ræninginn hafði einhverja fjármuni og nokkuð af sígarettum upp úr krafsinu. Mynd af honum náðist á öryggismyndavél í versluninni og rannsakaði lögregla málið í gær.

Einn karlmaður var við afgreiðslu í versluninni og vann ræninginn honum ekki mein.

Auk þessa leitar lögreglan á höfuðborgarsvæðinu enn innbrotsþjófa sem látið hafa til sín taka í Hafnarfirði og Garðabæ frá því í nóvember. Þrjú innbrot voru framin á svæðinu um jólin og náðist einn maður. Hann er ekki talinn tengjast þeim sem hafa flest brotin á samviskunni, samkvæmt upplýsingum Fréttablaðsins.

Lögregla beinir því til fólks að fylgjast með grunsamlegum mannaferðum og láta vita ef um slíkt er að ræða.- jss