Ronaldinho neitar því að hafa haldið partý

Margir ítalskir fjölmiðlar kenndu Ronaldinho um að AC Milan hefði tapað fyrir Inter á dögunum. Þeir héldu því fram að Brasilíumaðurinn hefði haldið heljarinnar partý nokkrum dögum fyrir leik.

Ronaldinho er þekktur fyrir að hafa gaman af því að lyfta sér upp en hann harðneitar þessum ásökunum.

„Ég var gestur á hóteli umrætt kvöld og það er ekki satt að ég hafi haldið eitthvað partý. Það sem er jafnvel ósannara eru smáatriðin sem hafa verið talin til í þessu máli," sagði Ronaldinho.

„Ég hef lagt afar hart að mér síðustu mánuði og mér finnst ekki rétt að nota gömlu ímyndina mína til þess að blása eitthvað upp."