Aðstoðarþjálfari Lazio: Hafði áhrif á leikmenn

Giovanni Lopez, aðstoðarþjálfari Lazio, segir að hvatning stuðningsmanna liðsins í garð Inter í kvöld hafi haft áhrif á leikmenn Lazio.

Stuðningsmenn Lazio héldu með mótherjunum í kvöld þar sem Inter er í baráttu við Roma um meistaratitilinn. Þeir vilja ekki með nokkru móti að Roma hampi titlinum.

„Þessi hegðun, hafði hún áhrif á okkur? Svarið er já, hún gerði það að einhverju leyti. Í undirbúningi fyrir leikinn reyndum við að hugsa ekkert út í þessa súrrealísku stöðu sem hefur myndast en það var ekki auðvelt."

„Það fór ekki framhjá neinum að allir á vellinum fögnuðu þegar Walter Samuel skoraði. Leikmenn gerðu sitt besta á vellinum en áttu erfitt með að einbeita sér vegna þessara aðstæðna."