Danir spara milljarða sem aldrei fyrr

Danskar fjölskyldur settu 8,6 milljarða danskra kr. eða um 180 milljarða kr. aukalega inn á bankareikinga sína á milli ágúst og september í ár. Þar með hefur sparnaður Dana slegið nýtt met.

Í umfjöllun um málið á börsen.dk segir að innlán heimila í dönsku bönkunum nemi nú tæplega 778 milljörðum danskra kr. eða rúmlega 16.000 milljörðum kr. Upphæðin, sem nemur yfir tífaldri landsframleiðslu Íslands, hefur aldrei verið hærri í sögu Danmerkur. Hún samsvarar því að hver Dani eigi að meðaltali 180.000 danskar kr. inn á bankareikningi eða um 3,8 milljónir kr.

Las Olsen hagfræðingur hjá Danske Bank segir að þessar tölur endurspegli það að Danir hafa fengið meira fé í hendur í gegnum skattalækkanir, útgreiðslur af séreignasparnaði og lægri vexti á íbúðahúsnæði. Á sama tíma nota Danir minna fé í einkaneyslu sína en raunin var á árunum fyrir fjármálakreppuna árið 2007.