Moratti ætlar að reyna að fá Messi: Ekkert grín

Massimo Moratti, forseti Evrópumeistara Inter, ætlar sér að reyna að kaupa Argentínumanninn Lionel Messi frá Barcelona.

Málið byrjaði með því að Moratti sagði, í gríni, að næsti leikmaður sem félagið ætlaði að kaupa væri leikmaður ársins hjá FIFA.

„Þeir eru mjög margir sem eru að biðja mig um að kaupa leikmann í heimsklassa til félagsins. Messi er sá besti af þeim öllum," sagði Moratti við ítalska fjölmiðla.

„Þegar ég sagði þetta um daginn var ég að grínast en nú skulum við sjá til. Ég er að velta því fyrir mér í fullri alvöru hvort félagið eigi að kaupa hann eða ekki."

Þó verður að teljast afar ólíklegt að Messi sé falur hjá Barcelona. Hann er samningsbundinn til 2016 og er með klásúlu í samningi sínum að hann megi fara annað fyrir 250 milljónir evra. Cristiano Ronaldo var keyptur á um 90 milljónir frá Manchester United til Real Madrid í fyrrasumar.