Kings spilar á Hróarskeldu

Miðasala á Hróarskelduhátíðina í Danmörku sem verður haldin 30. júní til 3. júlí á næsta ári er hafin. Af því tilefni var tilkynnt að bandaríska rokksveitin Kings of Leon myndi stíga þar á svið. Áður höfðu metalhundarnir í Iron Maiden boðað komu sína.

Miðasala á Hróarskeldu fer nú öll fram á heimasíðunni Roskilde-festival.dk. Forsvarsmenn hátíðarinnar ákváðu að selja aðgöngumiða einungis í gegnum heimasíðu sína til að bjóða gestum upp á nýjung sem var prufukeyrð í fyrsta sinn í ár. Þá gátu gestir pantað sér tjaldsvæði um leið og þeir keyptu miða sína.