Tiger kominn á kvennaveiðar

Golfkylfingurinn Tiger Woods er að sögn vefsíðunnar RadarOnline kominn aftur á markaðinn. Hann sást nýverið í fylgd með ókunnugri, ljóshærðri konu.

Tiger Woods og eiginkona hans, hin sænska Elin Nordegren, hafa ákveðið að skilja að skiptum eftir að upp komst um fjöldamargar hjákonur kylfingsins. Tímarit fluttu fyrst fréttir af framhjáhaldi Woods í nóvember síðastliðinn en hjónin hafa búið hvort í sínu húsinu upp frá því og býr Nordegren í leiguhúsnæði skammt frá fyrrverandi heimili þeirra hjóna.

Nýverið sást til Woods þar sem hann spígsporaði um golfvöll í grennd við heimili sitt í félagsskap ungrar, ljóshærðar konu.

„Tiger var að leika golf á vellinum við heimili sitt. Með honum var mjög falleg, ljóshærð kona og svipaði henni mjög til Elínar í útliti. Hún sat í golfbílnum á meðan hann tók nokkrar holur en þau virtust skemmta sér mjög vel saman," sagði sjónarvottur.

„Þau sátu og spjölluðu lengi saman og virtust njóta félagsskapar hvort annars. Af þessu að dæma virðist hann ekki vera hamingjusamlega giftur Elinu lengur, það er fyrir víst," sagði sjónvarvotturinn.

Vefsíðan RadarOnline greindi einnig frá því að Woods sækti skemmtistaði í auknum mæli og hefur nokkrum sinnum sést til hans á öldurhúsum í Orlando.

„Hann er sérstaklega hrifinn af stað sem heitir Embers. Svo virðist sem hann hafi óbeit á því að vera einn heima hjá sér," hafði tímaritið eftir einum kráareiganda.