Sneijder: Aðrir möguleikar standa mér til boða

Wesley Sneijder, leikmaður Inter Milan, segir að það séu margir möguleikar sem standi honum til boða ef hann vill ekki vera áfram í herbúðum Inter.

Sneijder hefur síðan í sumar átt í viðræðum við forráðamenn Inter um nýjan samning. Þær viðræður hafa enn ekki borið árangur en Sneijder segir að aðeins eigi eftir að ganga frá formsatriðum.

„Ef ég vildi fara myndu margir möguleikar standa mér til boða. En það sem er í forgangi hjá mér er að gera nýjan samning við Inter og ég held að það sé stutt í það," sagði Sneijder.

„Málið snýst um að ég er ekki lengur tvítugur heldur 26 ára. Ég verð því að skoða allt það sem getur gerst. En ég á ekki von á því að það verði vandamál að ganga frá nýja samningnum, það á aðeins eftir að klára nokkur smáatriði."