Zanetti: Við stefnum á þrennuna

Inter komst í gær í úrslitaleik ítölsku bikarkeppninnar með því að leggja Fiorentina 2-0 í tveimur leikjum. Javier Zanetti, fyrirliði Inter, á sér þann draum að liðið taki þrennuna á tímabilinu.

„Það er ánægjulegt að komast í úrslitaleikinn en við getum ekki byrjað að fagna fyrr en við vinnum hann," sagði Zanetti.

„Við erum enn í baráttunni á öllum vígstöðvum. Við munum leggja okkur fram í öllum keppnum; Meistaradeildinni, deildarkeppninni og bikarnum. Við förum alltaf í alla leiki með það markmið að vinna. Draumurinn er að ná að taka bikarinn í öllum þessum keppnum."

Líklegt er að Inter mæti Roma í úrslitaleik bikarsins en liðið vann fyrri leik sinn gegn Udinese 2-0. Í næstu viku mætast liðin svo í seinni leiknum.