Enn hikstar Inter

Inter gerði í kvöld jafntefli við Brescia á heimavelli í ítölsku úrvalsdeildinni í knattspyrnu.

Gestirnir komust yfir með marki Andrea Caracciolo á fimmtándu mínútu en Samuel Eto'o náði að jafna metin fyrir Inter með marki á vítaspyrnu á 73. mínútu.

Inter hefur nú gert þrjú jafntefli í síðustu fimm leikjum og aðeins unnið tvo af síðustu sex.

Liðið tapaði þar að auki fyrir Tottenham í Meistaradeild Evrópu fyrr í vikunni.

Inter er í öðru sæti ítölsku úrvalsdeildarinnar með nítján stig, þremur á eftir Lazio sem getur náð minnst fimm stiga forystu á toppi deildarinnar með sigri á grönnum sínum í Roma á morgun.