Marseille komið í sextán liða úrslit

Franska liðið Marseille er komið í sextán liða úrslit Meistaradeildar Evrópu eftir glæstan 0-3 útisigur á Spartak Moskvu.

Það var Mathieu Valbuena sem kom Marseille yfir eftir 17 mínútna leik og Marseille leiddi með þessu eina mark í hálfleik.

Loic Remy kom Marseille í 0-2 með marki þegar aðeins níu mínútur voru liðnar af síðari hálfleik.

Von Spartak hvarf svo endanlega þegar Welliton fékk að líta rauða spjaldið á 63. mínútu. Marseille þakkaði fyrir með því að bæta við þriðja markinu fjórum mínútum síðar.

Chelsea er efst í riðlinum með tólf stig, Marseille hefur níu og Spartak sex.