Van Persie vill fá Barcelona eða Real Madrid

Andstæðingur Arsenal í sextán liða úrslitum Meistaradeildar Evrópu verður sterkur. Arsenal getur aðeins mætt Barcelona, Real Madrid, FC Bayern og Schalke.

Arsenal kláraði Partizan Belgrad og komst þar með áfram en varð að sætta sig við annað sæti riðilsins. Þess vegna fær liðið þetta sterkan andstæðing í næstu umferð.

Hollendingurinn Robin Van Persie er hvergi banginn og vill helst fá annað Spánarliðið.

"Sem áhugamaður um fótbolta vil ég fá Barcelona eða Real Madrid. Við verðum að bíða og sjá hvað gerist," sagði Persie í kvöld.

"Það var mikil pressa á okkur í kvöld. Partizan spilaði vel og er fínt lið. Þeir héldu boltanum vel og létu okkur hlaupa. Við erum ekki hættir í þessari keppni og leyfum okkur að dreyma um betra gengi í keppninni."