Stefán Logi maður leiksins er Lilleström gerði jafntefli

Stefán Logi Magnússon var valinn maður leiksins hjá bæði Verdens Gang og Nettavisen þegar að Lilleström gerði 1-1 jafntefli við Brann á útivelli í norsku úrvalsdeildinni um helgina.

Stefán Logi fékk sjö í einkunn hjá báðum miðlum en Björn Bergmann Sigurðarson var einnig í byrjunarliði Lilleström og lék allan leikinn.

Hjá Brann var Birkir Már Sævarsson í byrjunarliðinu en Gylfi Einarsson kom inn á sem varamaður. Ólafur Örn Bjarnason sat allan tímann á bekknum hjá Brann.

Stefán Logi er á meðal efstu manna í einkunnagjöf beggja miðla fyrir allt tímabilið til þessa. Hann er í 16.-21. sæti hjá VG með 5,33 í meðaleinkunn og 34. sæti hjá Nettavisen með 5,17.

Heil umferð fór fram í norska boltanum í gær. Kristján Örn Sigurðsson lék allan leikinn fyrir Hönefoss sem tapaði fyrir Rosenborg á útivelli, 3-0.

Þá voru þeir Bjarni Ólafur Eiríksson og Veigar Páll Gunnarsson í byrjunarliði Stabæk sem vann 3-1 sigur á Strömsgodset á útivelli. Pálmi Rafn Pálmason var ekki í leikmannahópi liðsins.

Birkir Bjarnason átti möguleika á að skora í fimmta leik sínum í röð með Viking en liðið gerði markalaust jafntefli við Sandefjord. Birkir lék þó allan leikinn, rétt eins og Indriði Sigurðsson liðsfélagi hans hjá Viking. Stefán Gíslason var ekki í leikmannahópi liðsins að þessu sinni.

Þá gerðu Odd Grenland jafntefli við topplið Tromsö á heimavelli, 1-1. Árni Gautur Arason lék allan leikinn í marki Odd Grenland.

Lilleström er í fjórða sæti deildarinnar með 21 stig, sex stigum á eftir toppliði Tromsö. Viking er í sjötta sæti með nítján stig, Odd Grenland í áttunda með sautján, Stabæk í því níunda með sextán stig, Brann í þrettánda sæti með tíu stig og Hönefoss í fimmtánda og næst neðsta sætinu með átta stig.