Zlatan til Milan í kvöld - Robinho gæti komið í janúar

Spænskir fjölmiðlar greina frá því í dag að Zlatan Ibrahimovic verði orðinn leikmaður AC Milan í kvöld.

Samningurinn í heild sinni er sagður kosta Milan 102 milljónir evra. Barcelona fær 30 milljónir evra í kaupverð en himinhá laun leikmannsins í fjögur ár munu gera það að verkum að samningurinn mun kosta Milan yfir 100 milljónir evra.

Samningaviðræður stóðu langt fram á nótt og takist að landa málinu í kvöld mun Zlatan fara með Adriano Galliani, stjórnarformanni AC Milan, til Mílanó.

Milan er þrátt fyrir þessi tíðindi ekki hætt við að reyna að fá Robinho frá Man. City en nú er talið líklegt að hann fari til félagsins í janúar.