Dætur í stað dóps

Shaun Ryder, fyrrverandi söngvari bresku hljómsveitarinnar Happy Mondays, þakkar tveimur dætrum sínum fyrir breyttan lífsstíl sinn.

Ryder var mikill sukkari á árum áður og hefur lengi barist við áfengis- og eiturlyfjafíkn. Núna lætur hann sér nægja að fara með dætrum sínum í sund á morgnana í staðinn fyrir að hella sér í dópið.

„Ég er breyttur maður. Á hverjum degi er ég vakinn af þriggja ára dóttur minni Pearl sem vill fara með mér í sund. Einu sinni vaknaði ég og reykti tuttugu sígarettur áður en ég fékk mér eiturlyf. Núna rífa dætur mínar mig upp klukkan sex um morguninn og vilja að ég fari með þær í sund."