Bryant: Þetta er alltaf jafn sætt

Kobe Bryant sneri aftur í lið LA Lakers í nótt eftir að hafa misst af fimm leikjum vegna ökklameiðsla og lét heldur betur til sín taka.

Bryant skoraði 32 stig en hann skoraði 9 síðustu stig Lakers í leiknum og tryggði liði sínu 98-99 sigur gegn Memphis Grizzlies með glæsilegri sigurkörfu fyrir utan þriggja stiga línuna á lokasekúndunum.

„Þetta er alltaf jafn sætt. Í hvert sinn sem maður skorar sigurkörfu þá líður manni nákvæmlega eins og í fyrsta skiptið sem það gerðist," sagði Bryant glaður í bragði í leikslok.

Pau Gasol var vitanlega hæst ánægður með að Bryant var kominn aftur í liðið þrátt fyrir að Lakers hafi gengið vel án hans í leikjunum fimm.

„Það eru allir hættir að vera hissa yfir hlutunum sem Bryant getur gert inni á vellinum og gerir fyrir lið sitt. Hann stígur alltaf upp á ögurstundu og það er frábært að fá hann aftur í liðið," sagði Gasol.