Ljónið er fast úti í Hrísey í einangrun

Sirkus Ísland sýnir í Salnum í Kópavogi. Fyrsta sýning er á sunnudaginn og svo á að sýna í dymbilvikunni og um páskana, samtals ellefu sýningar. Sýningin er kölluð Sirkus Sóley.

„Í fyrra settum við upp sýninguna Stórasti sirkus Íslands í Hafnarfjarðarleikhúsinu. Við vorum með fimm sýningar og það var alltaf uppselt. Síðan þá höfum við verið að leita að stað til að sýna á og höfum verið að vinna hugmyndavinnu. Svo fór þetta allt í gang í janúar þegar við gátum fest okkur niður á leikhús,“ segir Kristín Thor, einn meðlima sirkusins.

„Þetta eru allt ný atriði núna. Að mörgu leyti er þetta hefðbundinn sirkus með öllu sem því fylgir, en við sleppum ljóninu. Það er fast úti í Hrísey í einangrun,“ segir Kristín og hlær. Hún er með mastersgráðu í dansi og segist nota þá reynslu í sirkusnum. Allir meðlimir sirkussins eru íslenskir nema Ástralinn Lee Nelson. Hann og Kristín sýna loftfimleika saman.

„Lee kom hingað fyrir fimm árum, er kvæntur íslenskri konu og er eiginlega orðinn hálfíslenskur. Hann hefur mikið komið fram sem trúðurinn Wally og troðið upp úti á götu. Það má eiginlega segja að hann hafi kennt mér allt sem ég kann í sirkus,“ segir Kristín.

„Hann fékk leiða á því að hafa ekki nóg að gera hérna svo hann stofnaði sirkusinn árið 2007.“

Kristín segir að Salurinn sé fínn staður fyrir sirkussýningar. „Fólkið á efri svölunum getur séð beint framan í mann þegar maður er kominn upp í fimm metrana. Ég læt mömmu sitja þar svo ég nái augnsambandi við hana.“

Og miðaverðið er hagstætt, 1.200 kr. á manninn.

„Við hugsum þetta þannig að fimm manna fjölskylda geti komið og líka keypt nammi og gos án þess að fara á hausinn,“ segir Kristín. Miðasala er hafin á midi.is. drgunni@frettabladid.is