Zlatan vill fá Balotelli til Milan

AC Milan hefur ekki farið leynt með áhuga sinn á ítalska framherjanum hjá Man. City, Mario Balotelli. Stjórnarformaður félagsins, Adriano Galliani, hefur þegar gefið það út að Milan muni kaupa hann ef City vill selja.

Leikmenn félagsins eru einnig spenntir fyrir því að fá Balotelli og hafa þeir Zlatan Ibrahimovic og Luca Antonini sent skilaboð til leikmannsins.

"Við erum alltaf að leita að góðum leikmönnum og vonandi kemur einn góður í janúar. Ég er búinn að heyra af Balotelli og það væri frábært ef hann kæmi. Ég myndi njóta þess að spila með honum," sagði Zlatan.