Emil skoraði tvö mörk í stórsigri Verona í kvöld

Emil Hallfreðsson skoraði tvö mörk fyrir Hellas Verona sem vann 4-0 sigur á botnliði Paganese í ítölsku C-deildinni í kvöld. Verona komst upp úr fallsæti með þessum góða heimasigri.

Emil skoraði bæði mörkin í fyrri hálfleik, það fyrra kom með þrumuskoti af teig á 13. mínútu og það seinna með skoti eftir skyndisókn á 31. mínútu. Emil kom Verona í 1-0 og í 3-0 í leiknum en öll fjögur mörk liðsins komu á fyrstu 45 mínútum leiksins.

Emil hafði skorað 2 mörk í fyrstu 14 leikjum tímabilsins og tvöfaldaði því markaskor sitt í þessum leik.