Þau eru að missa vinnuna

Töluvert af sitjandi þingmönnum eru að detta út, þar af eru fjórir þingmenn Sjálfstæðisflokksins sem munu hugsanlega bætast í hóp þeirra átján þúsund einstaklinga sem eru atvinnulausir.

Það eru Arnbjörg Sveinsdóttir, Birgir Ármannsson, Ásta Möller og svo Jón Gunnarsson. Varaþingmaðurinn Erla Ósk Ásgeirsdóttir er ekki heldur inni á þingi.

Vinstri grænir fá einnig sinn skell, Kolbrún Halldórsdóttir, umhverfisráðherra, er dottinn út af þingi. Þá er Álfheiður Ingadóttir ekki kjördæmakjörinn en hún er núna inni sem jöfnunarmaður.

Sigurður Kári Kristjánsson hjá Sjálfstæðisflokknum er einnig jöfnunarmaður þessa stundina.

Þess má geta að niðurstaðan er ekki endanleg enda ekki búið að telja öll atkvæðin.