Adriano kominn í leitirnar

Það hefur margt verið skrifað og skrafað um afdrif brasilíska framherjans Andriano eftir að hann lét ekki sjá sig hjá Inter eftir landsleikjahléð. Þess utan náði enginn í hann í síma, hvorki umboðsmaður hans né móðir.

Brasilískir miðlar voru sumir hverjir farnir að halda því fram að Adriano hefði verið rænt en málið er sem betur fer ekki svo alvarlegt.

Málið er engu að síður áhugavert enda kom aðeins yfirlýsing frá umboðsmanni hans í dag um afdrif kappans en engar frekari skýringar á því af hverju hann sé ekki farinn aftur til Ítalíu.

Í yfirlýsingunni segir að hann sé með fjölskyldu sinni í Rio de Janeiro. Hann hafi rætt við landsliðsþjálfara Brasilíu sem og forráðamenn Inter um þá erfiðu tíma sem hann sé að fara í gegnum.

Hver ástæða erfiðleikanna sé að þessu sinni er aftur á móti ekkert getið um.