Moggi baunar á Mourinho

Luciano Moggi, fyrrum framkvæmdastjóri Juventus, skýtur föstum skotum að Jose Mourinho í vikulegum pistli sínum í blaðinu Libero.

„Ég sé að Mourinho hefur breyst. Ég veit ekki hvort það er af því að hann hefur ekki sama sjálfstraust og áður eða hvort hann sé að nota nýja taktík með Inter í vetur," segir Moggi.

„Við munum öll að Mourinho er þessi hrokafulli leiðtogi sem kom líkt og stormsveipur í deildina okkar í fyrra. Það er ekkert eftir af þeim Mourinho. Sá sérstaki er ekki lengur brosandi og segir enga brandara," segir Moggi en hann telur að Mourinho sé hræddur.

„Ef menn sáu mörkin fimm sem Juve skoraði um helgina þá skilur maður af hverju hann er í vondu skapi. Hann gæti átt eftir að komast í enn verra skap ef Juve heldur áfram á sömu braut."