Vieira til Frakklands ef Inter vill hann ekki

Patrick Vieira er orðinn að afgangsstærð hjá Jose Mourinho og Inter hefur sett franska miðjumanninn á sölulista. Hann lék aðeins 24 leiki fyrir félagið á síðustu leiktíð.

Lyon og PSG eru bæði talin hafa mikinn áhuga á því að næla í Vieira.

„Ég þarf að hitta forráðamenn Inter til að fá það endanlega á hreint hvað félagið vill gera við mig," sagði Vieira.

„Ég vil bara fá að spila. Sama hvort það er hjá Inter eða annars staðar. Ég þarf líka að hitta Mourinho til að heyra það frá honum sjálfum hvort hann telji sig hafa not fyrir mig eður ei. Ef ekki þá vil ég frekar spila í Frakklandi."

Vieira varð 33 ára gamall í vikunni. Hann kom til Inter frá Juventus árið 2006 en hefur verið meira og minna meiddur síðan hann flutti til Mílanó.