Dudek langar aftur til Hollands

Pólski markvörðurinn Jerzy Dudek hjá Real Madrid virðist nú vera orðinn leiður á að vera varaskeifa fyrir Iker Casillas og segist hafa hug á að fara aftur til gamla liðsins síns Feyenoord í Hollandi.

Dudek tók þá áhugaverðu ákvörðun að ganga í raðir Real Madrid eftir að hafa verið orðinn leiður á að verma varamannabekkinn hjá Liverpool, en líklega eru fáir markverðir í heiminum jafn öruggir með sæti sitt og Casillas hjá Real.

Dudek hefur enda fengið afar fá tækifæri með spænska liðinu og virðist nú vera farið að leiðast þófið. Á blaðamannafundi eftir leik Liverpool og Real Madrid í gær lýsti hann því yfir að hann hefði hug á að fara aftur til Hollands.

Markvörðurinn á ekki langt eftir af samningi sínum við Real Madrid og því gæti vel verið að hann ætti eftir að snúa aftur til Rotterdam þar sem hann spilaði á árunum 1996-2001.