Beckham væri til í að spila í vörninni

David Beckham er afar hamingjusamur með að vera kominn aftur í herbúðir AC Milan. Honum er alveg sama hvar hann spilar með liðinu og væri þess vegna til í að spila í vörninni.

„Ég er til í að spila hvaða stöðu sem er, í vörninni sem og sókninni," sagði Beckham sem gerir ekki ráð fyrir að fara beint í byrjunarlið Milan.

„Það er ekki búist við mér í byrjunarliði. Ég vil bara vera hluti af liðinu. Leikmenn eru ekki öfundsjúkir og strákarnir voru glaðir að sjá mig aftur. Mánuðirnir sex með félaginu síðast voru með þeim bestu á mínum ferli og ég get ekki beðið eftir að spila hér á nýjan leik."