Maicon sagður hafa framlengt samning sinn við Inter

Brasilíumaðurinn Maicon hjá Inter er sagður samkvæmt ítölskum fjölmiðlum vera búinn að framlengja samning sinn við Ítalíumeistarana til ársins 2014.

Bakvörðurinn sókndjarfi var orðaður við stórlið á borð við Real Madrid og Manchester United í sumar eftir að hann lét hafa eftir sér að hann vildi vinna Meistaradeildina með Inter eða einhverju öðru félagi.

Nú hefur hann hins vegar ákveðið að vera áfram í herbúðum Inter en knattspyrnustjórinn Jose Mourinho lagði ríka áherslu á að halda leikmanninum áfram hjá félaginu.

„Ef við ætlum að vera samkeppnishæfir þá þurfum við að halda leikmönnum á borð við Maicon. Málið er ekkert flóknara en það," sagði Mourinho í viðtali við Gazzetta dello Sport.