Sigurður búinn að velja Kýpurfarana - Fannar Freyr er eini nýliðinn

Sigurður Ingimundarson er búinn að velja tólf manna landsliðshóp sem tekur þátt í Smáþjóðaleikunum á Kýpur sem hefjast í byrjun næsta mánaðar. Hlynur Bæringsson og Jón Arnór Stefánsson eru hvorugir í hópnum en vonir stóðu til að þeir gætu náð mótinu.

Sigurður velur einn nýliða að þessu sinni, Stjörnumanninn Fannar Freyr Helgason. Fannar Freyr spilaði vel með Stjörnuliðinu í vetur og var lykilmaður þegar Garðabæjarliðið tryggði sér bikarmeistaratitilinn.

Íslenska landsliðið spilar fimm leiki á fimm dögum á Smáþjóðaleikunum. Liðið mætir þar Möltu, Kýpur, Andorra, San Marínó og Lúxemborg. Íslenska liðið hefur titil að verja en liðið vann gull á síðustu leikum sem fóru fram í Mónakó 2007.

Helmingur af hópnum í ár var með þegar liðið vann gullið í Mónakó fyrir tveimur árum. það eru þeir Hörður Axel Vilhjálmsson, Jóhann Árni Ólafsson, Logi Gunnarsson, Magnús Þór Gunnarsson, Páll Axel Vilbergsson og Þorleifur Ólafsson.

Karlalið Íslands á Smáþjóðaleikunum 2009:

Bakverðir

Hörður Axel Vilhjálmsson, Keflavík 7 leikir

Logi Gunnarson, Njarðvík 67 leikir

Magnús Þór Gunnarsson, Njarðvík 64 leikir

Pavel Ermolinski, La Palma, Spáni 5 leikir

Þorleifur Ólafsson, Grindavík 9 leikir

Framherjar

Jóhann Árni Ólafsson, Proveo Merlins, Þýskalandi 7 leikir

Jón Norðdal Hafsteinsson, Keflavík 46 leikir

Páll Axel Vilbergsson, Grindavík 84 leikir

Sigurður Þorvaldsson, Snæfelli 42 leikir

Miðherjar

Fannar Freyr Helgason, Stjörnunni Nýliði

Fannar Ólafsson, KR 69 leikir

Sigurður Gunnar Þorsteinsson, Keflavík 12 leikir