Gattuso líklega á förum í janúar

Harðjaxlinn Gennaro Gattuso íhugar það alvarlega þessa dagana að hafa vistaskipti í janúar. Tækifærin hafa verið af skornum skammti hjá AC Milan í vetur og því íhugar Gattuso að fara annað.

Forráðamenn AC Milan vilja þrátt fyrir það alls ekki missa hann og hafa meðal annars boðið honum lífstíðarsamning.

Gattuso hafnaði því samningstilboði og við það reiddist yfirmaður félagsins, Adriano Galliani, og varaði Gattuso við því að líta á félagið eins og hótel.

Gattuso mun setjast að samningaborðinu við Milan á ný fyrir jól og þá ætti að koma í ljós hvort hann verður áfram eða fær að fara annað í janúar.