Sjálfstæðismenn gagnrýndu forseta Alþingis

Sjálfstæðismenn gagnrýndu fundarstjórn Guðbjarts Hannessonar, forseta Alþingis, í upphafi þingfundar í dag. Þingmennirnir Arnbjörg Sveinsdóttir, Ásta Möller og Pétur Blöndal sögðust öll hafa viljað leggja óundirbúnar fyrirspurnir fyrir ráðherra en sá liður var ekki á dagskrá né sérstök umræða um störf þingsins. Arnbjörg sagði forseta umturna öllum venjum í þinginu með því að hafa hvorugan liðin á dagskrá.

Guðbjartur sagði mikilvægt að störf þingins haldi fram og því hafi hann ákveðið að sleppa þessum dagskrárliðum að þessu sinni. „Það er auðvitað kominn sá tími sem við þurfum að fara að ljúka þinginu."

Í hádeginu hyggst Guðbjartur funda með formönnum þingflokka til að fara yfir fundarhöldin í dag og reyna að ná samkomulagi svo hægt verði að ljúka yfirstandandi vetrarþingi.