Þurfum aukna tekjuöflun og aðhald í ríkisrekstri

Steingrímur Sigfússon fjármálaráðherra sagði við eldhúsdagskrárumræður í kvöld að starfsöm og samhent ríkisstjórn hefði tekið við 1. febrúar. Hún  hefði komið miklu í verk eftir að nýfrjálshyggja Sjálfstæðisflokksins hafði beðið skipbrot eftir átján ára stjórnarsetu.

Steingrímur sagði þó að mörg erfið verkefni væru framundan. Nefndi hann sem dæmi endurreisn bankanna og að takast á við atvinnuleysið. Hann sagði að það yrði jafnframt erfitt að takast á við fjárlagahallann. Það yrði gert með blandaðri leið tekjuöflunar og aðhalds í ríkisrekstri.

Þá sagði Steingrímur mikilvægt að verja velferðarkerfið eins og kostur væri þannig að þeir sem væru aflögufærir myndu leggja eitthvað af mörkum en ekki þeir sem stæðu höllustum fæti.