Þriðja þrenna Inzaghi gegn Camolese

"Mér finnst þetta pínulítið leiðinlegt af því hann er góður maður og góður þjálfari," sagði markahrókurinn Filippo Inzaghi hjá AC Milan eftir að hann skoraði þrennu í 5-1 sigri liðsins á Torino í gær.

Maðurinn sem um ræðir er Giancarlo Camolese, þjálfari Torino, en þetta var í þriðja sinn á ferlinum sem hinn 35 ára gamli Inzaghi skorar þrennu á móti liði sem þjálfað er af Camolese.

Þetta var auk þess í tíunda sinn á ferlinum sem Inzaghi skorar þrennu í A-deildinni og hann minntist sérstaklega á David Beckham í viðtali eftir leikinn.

"Ég verð að þakka David fyrir fyrirgjafirnar. Þær voru frábærar," sagði Inzaghi. Beckham lagði upp tvö mörk í leiknum og með sigrinum komst Milan upp að hlið Juventus í annað til þriðja sæti deildarinnar með 64 stig - tíu stigum minna en topplið Inter.