Niðurstaða í næstu viku

Í næstu viku kemur í ljós hvort að Didier Drogba verður refsað fyrir framkomu sína eftir leik Chelsea og Barcelona í Meistaradeild Evrópu í vikunni.

Knattspyrnusamband Evrópu, UEFA, hefur staðfest að það hafi móttekið bæði skýrslu dómara sem og eftirlitsmanns.

„Það er nú verið að kanna þetta mál og verður ákveðið í næstu viku hvaða skref verða tekin næst."

Drogba var einn fjölda leikmanna Chelsea sem mótmæltu störfum dómarans í leiknum. Drogba gekk þó einna lengst í mótmælum sínum.