Dýpri kreppa en búist hafði verið við

Niðursveiflan í bresku efnahagslífi hefur verið meiri en Seðlabanki Englands gerði ráð fyrir, þrátt fyrir það eru væntingar um efnahagslegan bata að mati Seðlabankans. Bankinn á von á því að efnahagssamdrátturinn muni nema 5,5 prósentum áður en horfur í efnahagslífinu snúast til betri vegar.

Forsvarsmenn Seðlabankans segjast sjá jákvæð áhrif af tæplega 200 milljarða punda innspýtingu bankans í hagkerfið á undanförnum misserum og benda á nýlegar rannsóknir sem styðji ummæli bankans.

Seðlabankinn gefur ársfjórðungslega út skýrslu um verðbólguspár sínar. Í þeirri nýjustu kemur fram að á næstu tveimur árum muni verðbólgan verða vel innan við tveggja prósenta verðbólgumarkmið bankans.

Seðlabankastjórinn, Mervyn King, segir að líklega þurfi hann að skrifa breska fjármálaráðherranum, Alistair Darling, bréf síðar á þessu ári til að útskýra fyrir honum af hverju verðbólgan hafi farið niður fyrir eitt prósent.

Slík verðbólga væri komin út fyrir vikmörk bankans og myndi þar af leiðandi þarfnast útskýringa.