Lavezzi tekur u-beygju og vill vera áfram hjá Napólí

Fastlega var búist við því að argentínski landsliðsmaðurinn Ezequiel Lavezzi myndi yfirgefa herbúðir Napólí í sumar eftir að hann lét í ljós óánægju sína með allt og alla hjá félaginu á síðustu leiktíð.

Leikmaðurinn kvartaði þá sárann yfir því að vera ekki metinn af verðleikum sínum bæði hjá forráðamönnum, leikmönnum og aðdáendum Napólí.

Nú virðist hins vegar allt vera í besta lagi og Lavezzi vill vera áfram hjá félaginu þrátt fyrir að vera sterklega orðaður við Inter og Boca Juniors.

„Ég er núna ánægður hjá Napólí. Mér finnst samband mitt við aðra leikmenn liðsins hafa batnað til muna og sama á við um forráðamenn félagsins. Minn hugur er hjá Napólí og ég ætla að gera allt mitt til þess að liðinu gangi vel. Það er hvort sem er ekki í mínum höndum ef einhver lið hafa áhuga á mér," segir Lavezzi í samtali við Radio Del Plata.