Fernandez í troðkeppnina

Spænska bakverðinum Rudy Fernandez hjá Portland Trailblazers hefur verið boðið að taka þátt í troðkeppninni um stjörnuhelgina í NBA sem fram fer í febrúar.

Ef marka má frétt úr The Oklahoman verða það því Fernandez, Rudy Gay hjá Memphis, troðkóngurinn Dwight Howard hjá Orlando og fyrrum troðkóngurinn Nate Robinson hjá New York sem fá að taka þátt í þessu vinsæla skemmtiatriði um stjörnuhelgina.

Leikurinn fer fram í Phoenix þann 14. febrúar en troðkeppnin og skotkeppnin eru jafnan á dagskrá á laugardeginum, daginn fyrir sjálfan stjörnuleikinn.

Fernandez hefur átt fína spretti á sínu fyrsta ári með Portland, en hann átti líklega frægustu tilþrif körfuboltakeppninnar á ÓL í sumar þegar hann tróð einmitt yfir Dwight Howard í bandaríska liðinu.

Smelltu hér til að sjá troðslu Spánverjans í sumar undir lýsingu agndofa landa hans.