Prince æfir með KR

Prince Rajcomar er kominn aftur til landsins og æfir þessa stundina með KR. Þetta staðfesti Rúnar Kristinsson í samtali við fréttastofu.

„Við settum okkur í samband við hann og buðum honum til landsins eftir að við sáum að Blikar væru búnir að gera upp sinn samning við hann," sagði Rúnar en Prince hefur leikið með Blikum frá 2007 og var samningsbundinn liðinu út næstu leiktíð.

„Hann fór svo aftur út til Hollands og var með einhver lið í huga þar sem hann vildi fara til en það gekk ekki eftir."

„Hann var hins vegar ánægður með dvöl sína á Íslandi og var því jákvæður því að koma og æfa með okkur. Við höfum áhuga á honum en ætlum okkur ekki að fá leikmenn til félagsins fyrir hvað sem er. Við þurfum að berjast við kreppuna eins og allir aðrir," sagði Rúnar.

Prince fékk fá tækifæri í byrjunarliði Breiðabliks á síðari hluta tímabilsins nú í sumar.