David Trezeguet líklega á förum frá Juventus

Franski framherjinn David Trezeguet er líklega á förum frá Juventus eftir tíu ára veru hjá Tórínóborgarfélaginu.

Hinn 31 árs gamli Trezeguet meiddist á nára í upphafi síðasta keppnistímabils og var lengi frá vegna meiðslanna. Þegar hann kom til baka átti hann svo erfitt með að festa sig i sessi í byrjunarliðinu og nú er hann sagður vilja yfirgefa félagið.

Mörg af stórliðum Evrópu eru sögð hafa áhuga á honum en framherjinn hefur hrunið í verði undanfarið og rúmar tvær milljónir punda gætu verið nóg til þess að tryggja þjónustu þessa reynda markaskorara.

Samkvæmt heimildum Gazzetta dello Sport eru AC Milan, Roma og Lyon sögð vera á meðal þeirra félaga sem hafi sent fyrirspurn til Juventus útaf Trezeguet.