Eignumst við okkar annað gull á stórmóti unglingalandsliða?

Íslenska 19 ára landsliðið á í kvöld möguleika á að verða heimsmeistari þegar liðið mætir Króatíu í úrslitaleik HM í Túnis. Íslenska liðið vann heimamenn í Túnis í undanúrslitunum og getur nú leikið eftir afrek 1984-landsliðsins sem vann gull á Evrópumótinu árið 2003.

Árið 2003 vann íslenska piltalandsliðið 27-23 sigur á því þýska í úrslitaleik eftir að hafa unnið eins marks sigur á Svíum í undanúrslitaleiknum. Einar Ingi Hrafnsson var markahæstur í úrslitaleiknum með 7 mörk en Ásgeir Örn Hallgrímsson skoraði 6 mörk og þeir Arnór Atlason og Hrafn Ingvarsson voru báðir með 4 mörk.

Ásgeir Örn Hallgrímsson var fyrirliði íslenska liðsins og hann varð markahæsti maður úrslitamótsins með 55 mörk í 7 leikjum. Ásgeir var í úrvalsliði mótsins ásamt Arnóri Atlasyni. Arnór skoraði 14 mörk í undanúrslitaleiknum á móti Svíum.

Ásgeir Örn og Arnór ásamt Björgvin Páli Gústavssyni markverðir voru eins og kunnugt er allir með A-landsliðinu sem vann silfur á Ólympíuleikunum í Peking á síðasta ári.

Í Évrópumeistaraliðinu 2003 voru eftirtaldir leikmenn: Andri Stefan, Arnór Atlason, Árni Björn Þórarinsson, Árni Þór Sigtryggsson, Ásgeir Örn Hallgrímsson, Björgvin Páll Gústavsson, Einar Ingi Hrafnsson, Hrafn Ingvarsson, Ingvar Árnason, Ívar Grétarsson, Jóhann Gunnar Einarsson, Kári Kristján Kristjánsson, Pálmar Pétursson, Ragnar Hjaltested, Sigfús Páll Sigfússon og Þórður Þórðarson.

Heimir Ríkarðsson þjálfaði liðið og aðstoðarmenn hans voru Andrés Kristjánsson og Karl Erlingsson.

Þá má ekki gleyma því að íslenska 21 árs landsliðið vann brons á HM í Egyptalandi árið 1993 eftir 21-20 sigur á Rússlandi í leiknum um 3. sætið. Meðal leikmanna í því liði voru Ólafur Stefánsson, Dagur Sigurðsson, Sigfús Sigurðsson, Aron Kristjánsson og Patrekur Jóhannesson. Það var Aron sem skoraði sigurmarkið í bronsleiknum. Þetta var til þessa besti árangur íslensk handboltaliðs á HM.