Adelman frétti af uppskurði McGrady í blöðunum

Rick Adelman, þjálfari Houston Rockets í NBA deildinni, húðskammaði Tracy McGrady eftir að hann las um að hann væri að fara í uppskurð í blöðunum á dögunum.

Eins og fram hefur komið þarf McGrady, þriðji stigahæsti leikmaður Houston, að gangast undir hnéuppskurð og er úr leik hjá liðinu í vetur - og það ekki í fyrsta skipti.

Adelman vissi að McGrady hefði verið tæpur til heilsunnar, en las um fyrirætlanir leikmannsins í blöðunum. "Það ættu að vera samskiptareglur sem koma í veg fyrir svona. Maður á ekki að þurfa að lesa um svona lagað í blöðunum og ég skil ekki af hverju í ósköpunum hann gerði þetta. Svona gerir maður ekki," sagði Adelman.

McGrady hefur að meðaltali misst úr 27 leiki á ári hjá Houston síðan hann gekk í raðir liðsins árið 2004.